۱۳۹۴ فروردین ۲۳, یکشنبه

خانم تلۆعی، سێلێنا خانم، برازای شیرینم، بەخێرهاتی بۆ دنیا.

خانم تلۆعی، سێلێنا خانم، برازای شیرینم، بەخێرهاتی بۆ دنیا. 
وێنەی جوانت هەر لە ئیستاوە خاتوونێکی جیدیم نیشان دەدا بە دەستێکی راسان و مشتێکی گرێ کراو،  وەک بلێی هەر لە ئیستاوە دەزانی پێت ناوەتە جیهانێک و ناوچەیەک پراوپر لە نابەرابەری، بە تایبەت نابەرابەری جنسییەتی. پێم وایە دەزانی ناچاری بۆ سەرەکی ترین مافەکانت تێبکۆشی. 
هیوادارم جیلی تۆ ئازارەکانی جیلی منی نەبێ. دەزانم هیوایەکی زۆر خۆشبینانە و خەیالییە. دەی باشە، کەواتە دەلێم هیوادارم جیلی تۆ ئازارەکانی زۆر لە جیلی من کەمتر بێ. 
ئازیزەکەم جادەی ژیانی ژن لە ناوچەکەی ئێمە پڕ بوو لە دڕک و گابەرد... 
کاتێک پوورە رۆیات مندال بوو لەبیری دێ:
ژنێکی جوان بوو پێیان دەوت سەیزایە خانم. سەیزایە خانم بێوەژن بوو. بێوەژنێکی جوان و خۆشروو و خاوەن دوو مندال. بۆ بەخێو کردنیان دەمووچاوی ژنانی هەلدەگرت. داخی فەقیری و هەژاریەکەی لەولاوە بێستێت، لەملاوە تەنیا بە تاوانی خۆشروویی هەزاران قسە و قسەلۆکیان بۆ ساز دەکرد. سەیزایەی بالابەرزی خۆشروو کاتێک دەمووچاوی ژنانی خزمی هەلدەگرت، بە هێواشی شتهایەکی لە قسەی خەلک دەگێراوە و ئاخی هەلدەکێشا و فرمێسکی چاوی دەسریەوە. پوورە رۆیات مندال بوو. نەیدەزانی ئەو قسانە دەقیقەن یانی چی بەلام دەیدی سەیزایە بالابەرز و خۆشرووەکە زۆر جار دەگریا. پوورت دوایە گەورەتر بوو زانی خۆشروویی ژن جۆرم و تاوانە...
ئەختەر ژنێکی گەنج و بێباک بوو. هەرکات خەرامان خەرامان لە خیابانی بیمارستاندا بە پیاسە رەد دەبوو، هەر ساحەب دووکان بوو سەفیان کێشابوو، ملیان رادەکێشا و چاویان دەردەپەری تا تەواوی هەیکەلی بە چاویان بپێون. رۆژێک ئەختەر بوو بە نەقلی بانە. تا ماویکی زۆر قسەی پێدەوترا و موحاکیمە دەکرا. ئاخر ئەختەر بە خۆی ئیجازەی دابوو لە خیابان لەبەر چاوی پیاواندا ساندویچێک بکرێ و بیخوات! دوایە پوورە رۆیات گەورەتر بوو زانی ساندویچ خواردنیش بۆ ژن جورم و تاوانە...
باوەگەورەت پیاوێکی بەراستی رۆشنبیر بوو. زیاتر لە ٤٠ سال لەمەوبەر کە تەنانەت ماشینیش لە بانە کەم بوو، تەنیا سێ مندال لە بانە دووچەرخەیان بوو. پوورت و دووکور. پوورە رۆیات لە لای دایک و باوک بە بێ جیاوازی نێوان کچ و کور بارهاتبوو. لەگەل مندالە کورەکان  موسابیقەی دووچەرخە سواریان دادەنا و زۆربەی کات لێیانی دەبردەوە. ئەو کاتانەی ئازاد و رەها لەو سورعەتەدا بە دووچەرخەکەیەوە دەتوت هەلدەفرێ، نەیدەزانی مانای نیگای تیژی کچە دراوسێ چییە. کچە دراوسێ رۆژێک بانگی کرد و پرسیارێکی لێ کرد. هێشتا پوورت نەیدەزانی مانای ئەو پرسیارە چیە. چوو بە دایە نۆشێی وت. لە هەڵچوونی دایە نۆشێ و چوونە سەر مالی دراوسێ زانی هەر چی هەیە زۆر ناخۆشە. پوورە رۆیات عاشقی دووچەرخە بوو و رانەوەستا بەلام دوایە کە گەورە بوو مانای پرسیارەکەی زانی و تێگەیشت دووچەرخە سواری لەگەل کوران بۆ کچێکی ۷-۸ سالە جورم بوە. جورمێکی زۆر گەورە...
پوورە رۆیات لەبیری دێ ژنێکی گەنج بە خۆی ئیجازەی دابوو چەن جار سوار تاکسیەک بێت و بچێت بۆ کتێبخانەی گەرەکی سەروو کتێب وەرگرێ. دوای ماوەیەک لە لایەن مێردی دلپیسیەوە بە تاوانی سوار تاکسی بوون گومانی خەیانەتی سەرخرا و تا پای بەردباران چوو. هەرچەن لە کۆتاییدا بێگوناهی ئەو ژنە سەلمێندرا بەلام پوورە رۆیات ئەوپەری تالی و سترێسی ژیانی ژنێکی بە ناحەق تاوانبار کراوی لە چاوەکانیدا دی کاتێک کە قسەی ناحەقی خەلک لە بەردەکانی بەردەبارانی ئیحتمالی ئازاری زیاتر بوو. پوورە رۆیات گەورەتر بوو زانی تەنانەت رۆژی دوو جار سوار تاکسی بوون بۆ ژن جۆرمە، تاوانێکی زۆر قورس...

پوورە رۆیات گەورەتر بوو، ئەو زولمانەی پێ قبوول نەدەکرا. بۆی هەزم نەدەبوو چۆن دەبێ ژنێک وەک ئینسانێکی قەوی لە بنەمالەکەیدا پەروەردە بکرێ بەلام کۆمەلگا بە زۆر بیهەوێ بیکات بە ژنێکی زەعیف و ترسەنۆک و کۆیلە. پوورە رۆیات کاتێک  کتێبی «جنسی دووەم»ی سیمۆن دوباری خوێندەوە جوان جوان لەو رستە تێدەگەیشت کە «ژن، ژن لە دایک نابێ، کۆمەلگا دەیکات بە ژن.» 
سلێنا گیان، پوورت بەو پەری عوسیان و سەرکەشییەوە ملی بەرز رادەگرێ و دان پێدا دەنێ کە موجریم و تاوانبارە. هەم خۆشروو بوو و دەم بە پێکەنین، هەم ساندویچی خوارد، هەم بە تەنیا سوار تاکسی بوو، هەم لە جیاتی دووچەرخە سواری، لە ماشین خوڕا و بەربەستی رانندگی ژنانی لە بانە شکاند. پوورت تازە چەن قەیەمی ئەولاتر نا. خۆی لە هیچ پیاوێک بە کەمتر نەزانی بگرە باوەریشی بوو لە زۆر پیاوی دەورووبەری قەویترە. بە تەنیا چوو لە زانکۆی شارێکی دوور دەرسی خوێند. بوو بە دوکتۆر و گەرایەوە بانە. تازە نازانی چەن جنایەتکار بوو! هێشتا شووی نەکردبوو برۆشی هەلگرت و نیگا تیژەکانی ژنە دراوسێی بە هیچ گرت!!! داستان بەوەش کۆتایی نەهات. ئەم پوورە تاوانبارەت دەستی برد بۆ قەلەم و ئازارەکانی ژنی کوردی نووسی. تەنانەت بە خۆی ئیجازەی دا وێنەی لە پای وتارەکانی چاپ ببێ! تاوانێک کە مەلای سازمانی ئیرشادی شێت کردبوو کە چۆن وێنەی ژن چاپ دەکەن و تازە بەدحیجابیشە!!!
پوورت رێبواری پر لە عوسیانی رێگایەک بوو کە ژنانی پێش جیلی خۆی بە رچەشکێنییەکانیان کەم کەم برێک خۆشیان کردبوو. لە داستانی خەیالیی عوسیانی دایە حەوا و دەست بردن بۆ دارە سێوەکەوە بیگرە تا هیمەتی سەیزایە بۆ ئەوەی دەستی لە گیرفانی خۆیدا بێت. لە ساندویچەکەی ئەختەر کە نۆشی گیانی بێ، تا ژنە کتێب خوێنەکەی ناو تاکسی و زۆر داستانی تری ژنانی بانە کە لەم کورتەدا نەگونجاوە. 
ژنانی جیلی پوورت رێگاکەیان کەمێ زیاتر کوتا و نەختێک سافتریان کرد. ئیستا لە ماشین خوڕان، دەرس خوێندنی ئاستی بالا بە تەنیا لە شارێکی تر، سەفەری ژنان بۆ شارەکانی تر، دەمووچاو و برۆ هەلگرتنی پێش پێکهێنانی ژیانی هاوبەش، نووسینی ژنان و بلاو کردنەوەی وێنەی ژن و … یا جورم و تاوان نیە یا خود جورمەکەی کەمترە. هەرچەن هێشتاش ئازاری ژنان بەردەوامە و تا گەیشتن بە مافی ئینسانی و تەواو یەکسانی ژن و پیاو و هەروەها کورد و نەتەوەکانی تر، رێگایەکی زۆر دوور و درێژمان لەبەرە، بەلام دلنیام جیلی دوای من کە پێش تۆیە، جیلی خوشکەزا ئەزیزەکانم نیوشا و نیلا، بۆ تۆی خۆشتر دەکەن. هیوادارم نۆرەی تۆ هات ئیتر کاتی ئاسفالت کردنی هاتبێ. 

سێلێناکەم، لە گشت جوانیەکانی روومەتت جوانتر ئەو مشتەیە رۆلەم.  قەوی بە برازا شیرینەکەم. قەوی بە...

۱۳۹۴ فروردین ۱۵, شنبه

وتوووێژێک بە زمانی ئینگلیسی لەگەل بەشی ئینگلیسی رۆناهی تیڤی لەسەر سەفەری یەکەم مەقامی رەسمی رۆژئاڤا بۆ ئەمریکا
ئەگەر فایلی سەرەکیم بۆ بنێرن ژێرنووسی کوردی بۆ دادەنێم بۆ ئەو هاورێیانەی کە ئینگلیسی نازانن. 

خودسوزی زنان در سنندج به زبان کوردی

تەواوی گولە سووتاوە پەرپەرەکانی کورد، سەر هەلێنن. خوشکانتان لە کوبانی حیماسە دەخولقێنن. ژنی کورد بە وتەی هاوسەرۆکی ئەنجۆمەنی گەل لە کوبانی کە دوێشەو پێێ وتم، دەچێت کە رێبەرایەتی ئازادی ژنی رۆژهەلاتی ناڤین بکات. گولە سووتاوەکان سەرهەلێنن. پیاوسالاری روو لە تەسلیمە. گولە تازەکان خۆتان مەسووتێنن. پێوەستی خەباتی ژنی کورد بۆ ئازادی بن. قەفەس بشکێنن. خۆسووتاندن رێگای ئازاد بوون نیە.  https://zanantv.net/blog/2012/11/27/خودسوزی-زنان-در-سنندج-به-زبان-کوردی/

۱۳۹۳ دی ۲۹, دوشنبه

مۆزاحمەت بۆ ژنان، دیاردەی سادراتی خیابانەکانی ئێران بۆ کۆبانی؟!


ئیجادی مۆزاحمەت و مەتەلەک وتن بە ژنان زۆر دیاردەیەکی قێزەونە. ئەگەریش ئەو کارە سادر بکرێ بۆ کوبانی خۆراگر، سەد چەندان قێزەونتر دەبێ

۱۳۹۳ آذر ۵, چهارشنبه

نامەی چالاکانی مافی ژنان لە رۆژهەلاتی کوردستانەوە بۆ کانتۆنی جەزیرە سەبارەت بە یاسای پشتیوانی ژنان

بۆ هاوسه‌رۆکانی به‌رێوه‌به‌ری خۆسه‌ری دیموکراتی کانتۆنی جه‌زیره‌، خاتوو هه‌دیه‌ یوسف و به‌رێز حه‌میدی ده‌هام ئه‌لعاسی
ئێمه‌ ژنانی کورد خه‌باتی هاونیشتمانانی خۆمان له‌ ڕۆژئاوا ده‌بینین و ده‌بیستین، سه‌ری ڕێز بۆ ئه‌و هه‌موو تێکۆشانه‌ و گیانبه‌ختکردنانه‌ داده‌نێین که‌ ڕۆژانه‌ له‌ پێناو که‌رامه‌تی مرۆڤایه‌تی حه‌ماسه‌ ده‌خۆڵقێنن، شانازیتان پێوه‌ ده‌که‌ین و پاڵپشتیتان لێ ده‌که‌ین.
ئێوه‌ سه‌ڵماندوتانه‌ که‌ ئه‌گه‌ر هاوسه‌نگه‌ر له‌ سه‌نگه‌ره‌کانی به‌رخۆدان نیشتیمان ده‌پارێزن، هاوشانیش له‌ ئیداره‌ی سیاسی حکوومه‌ت به‌رێه‌وه‌ ده‌به‌ن و هاوسه‌نگ له‌ کۆمه‌ڵگاش رۆل ده‌بینن. ئه‌مه‌ لاپه‌ره‌یه‌کی نوێ له‌ مێژووی ژنانی رۆژهه‌لاتی ناوه‌راسته‌ که‌ ساڵیانی ساڵه‌ نابینرێن و ته‌نیا بۆ ئامانجی تایبه‌ت به‌کاریان دێنن.
ئێوه‌ به‌ ئیراده‌ی ئاسنگینتان ڕیگه‌تان نه‌داوه‌ هێزی جه‌هڵ داگیرتان بکات و وه‌ک کۆیله‌ مامه‌له‌تان له‌گه‌ڵ بکات. ئێوه‌ مێژوو به‌ تێکۆشانێک ده‌نووسن که‌ جیهان به‌ ده‌گمه‌ن بینیویه‌ و ڕۆژهه‌ڵاتی ناوین ئاسته‌مه‌ که‌ به‌و رێگایه‌دا رۆیشتبێت. رێگاتان ئه‌وه‌نده‌ مه‌زه‌نه‌ و جێی هه‌نگاوه‌کانتان ئه‌وه‌نده‌ به‌هێزه که‌ نه‌ ته‌نیا ئێمه‌ی کورد که‌ هه‌ر ئازادیخوازێ له‌ جیهان بۆتان دێته‌ ده‌نگ. تێکۆشان و بیرۆکه‌ی یه‌کسانی خوازتان جمووجۆلیه‌کی له‌ بیرۆکه‌کان خستووه‌ که‌ هه‌ر جوولانه‌وه‌یه‌ بێ رۆڵی کاریگه‌ری ژنان کاریگه‌ر نابێت.
له‌سه‌ره‌تای مژداری 2014 هه‌واڵی واژۆکردنی یاسای تایبه‌ت به‌ ژنان له‌ کانتۆنی جه‌زیره‌ بڵاوبووه‌ته‌وه‌ که‌ سرنجی چالاکانی ژنی به‌ خۆی راکێشاوه‌. باوه‌رمان هه‌یه‌ که‌ برواتان وایە دیموکراسی به‌ ره‌خنه‌ گرتن و ره‌خنه‌ قه‌بوول کردن مه‌شق ده‌کرێت. ئێمه‌ ژنانی کورد که‌ باوه‌رمان به‌ ماف و ئه‌رکی یه‌کسان هه‌یه‌ به‌ ئه‌رکی خۆمان ده‌زانین وێرای سپاس و ده‌سخۆشی بۆ دانانی ئه‌م یاسا تایبه‌ته‌ چه‌ند ره‌خنه‌یه‌ک له‌م یاسایه‌دا بگرین و داوا بکه‌ین پێداچوونه‌وه‌یه‌کی پێدا بکه‌ن.
وه‌ک ئه‌ه‌ی که‌ خۆتان له‌ ده‌قی یاساکه‌یدا ئاماژه‌تان پێکردووه‌ مافه‌ بنه‌ڕه‌تییه‌کانی ژنانی دابینکردووه‌ ئه‌گه‌ر جێبه‌جێ بکرێت هه‌نگاوێکی باش بۆ نه‌مانی ئاپارتایدی ره‌گه‌زی و گه‌یشتن به‌ مافی یه‌کسانی داده‌نێت. ئێمه‌ ره‌خنه‌یه‌کی جدیمان له‌ ماده‌کانی 14 و 18 هه‌یه‌ و تێبینیه‌کی بچووک له‌سه‌ر ماده‌ی 29.
ماده‌ی 14 ئاماژه‌ ده‌کات هه‌ردوولا مافی جیابوونه‌وه‌یان هه‌یه‌ و نابێ جیابوونه‌وه‌ به‌ ئیراده‌ی ته‌ک لایه‌نه‌ بێت.
له‌م به‌نده‌ یاساییه‌ وێرای ئه‌وه‌ی مافی یه‌کسان بۆ ژن و پیاو دانراوه‌ به‌لام ئه‌وه‌ی که‌ جیابوونه‌وه‌ ده‌بێ به‌ خواستی هه‌ر دوو لایه‌ن بێت، جێی پرسیار و گله‌ییه‌. ئاخۆ ده‌بێ ئاکامی ئه‌و ژیانه‌ زۆره‌ملیه‌ چی بێت و مافی ئه‌و لایه‌نه‌ که‌ نایه‌وێ ئه‌و ژیانه‌ ئیدامه‌ بدا چی به‌سه‌ر دێت؟! کام دێری یاسایی له‌ مافی ئه‌و لایه‌نه‌ پاڵپشتی ده‌کات؟! درێژە پێدانی ژیانی زۆره‌مڵی له‌ کام پره‌نسیپی سه‌ره‌کی ئاماژه‌ی پێ کراوه‌؟!پێوه‌ره‌کانی ژیانی ئازاد له‌ کوێی ئه‌م یاسایه‌دا خۆی ده‌نوێنێ؟!
ماده‌ی 18 ئاماژه‌ به‌ سپاندنی سزای توند له‌ سه‌ر ئه‌نجامدانی خیانه‌تی هاوسه‌ری به‌ یه‌کسانی بۆ هه‌ر دوولا ده‌کات. ئێمه‌ به‌و باوه‌ره‌داین که‌ یاسا نابێ له‌ بواری جه‌سته‌ و په‌یوه‌ندی تاکه‌کان ده‌ستێوه‌ردان بکات و ئه‌گه‌ر که‌سێ گومانی خه‌یانی هاوسه‌ری هه‌یه‌ خۆی ده‌بێ بریار بدات ئایا دەیەوێ درێژە بەو ژیانە هاوبەشە بدات یا نا؟ جا ئه‌گه‌ر ماده‌ی 14 پێداچوونه‌وه‌ی پێ بکرێت ئه‌توانێ مافی جیابوونه‌وه‌که‌ی به‌کاربێنێت نه‌ شتێ زیاتر و نه‌ ئه‌وه‌ی که‌ سزای بۆ دیاری بکرێت ئه‌ویش سزای توند به‌ سنوورێکی دیاری نه‌کراو.
سه‌باره‌ت به‌ ماده‌ی 29 باشتر وایه‌ دارایی لایه‌نه‌ به‌رامبه‌ره‌کان دوای جیابوونه‌وه‌ به‌ یه‌کسانی دابه‌ش بکرێت، ئێمه‌ باوه‌رمان به‌ ماڤ و ئه‌رکی یه‌کسان هه‌یه‌. ژن ئه‌گه‌ر شتێکی بۆ ژیانی هاوبه‌ش خه‌رج کردبێت ئه‌رکی خۆی به‌جێهێناوه‌ نه‌ک شتێ که‌ ده‌بێ پێی بدرێته‌وه‌.
ئێستا که‌ ژنانی کورد له‌ ڕۆژئاوا سه‌ڵماندوویانه‌ که‌ بۆ گه‌یشتن به‌ کۆمه‌ڵگای ئازاد و دیمۆکرات ئه‌و په‌ره‌ی هێزیان به‌کار دێنن و به‌ یاسایه‌کی پێشکه‌وتوو که‌ رێز له‌ کرامه‌تی مرۆڤایه‌تی ده‌گرێت ئەوەیان زیاتر سەلماندوە، کەواتە نابێ چه‌ن خالی لاواز سیمای بشێوێنێت.
ئێمه‌ وه‌ک هاونیشتیمانانتان له‌ به‌شێکیتری کوردستان داوا ده‌که‌ین که‌ ئاورێ له‌ ماده‌کانی 14، 18و29 بده‌نه‌وه‌ تا هاوسه‌نگی ماده‌کانی تر ئیراده‌ی یه‌کسانی خوازتان له‌ پێناو که‌رامه‌تی مرۆڤایه‌تی دابین بکات.
هەروەها لە خالی 2 دا بە گشتی ئاماژەتان بە مافی ژنان کردوە بەلام ئێمە پێمان وایە «مافی خوێندن» تایبەتمەندییەکی بالای هەیە و پێویستە لە خالێکی جیاوازدا ئاماژەی پێ بدرێ و جەختی لەسەر بکرێت.
پێشنیاری ئێمە بۆ مادەی14 ئەمەیە: مافی جیابوونەوە مافی هەردوولایە و هەر کام لە هاوسەران دەتوانن داخوازی تەلاق پێشکەش بە دادگا بکەن.
هەروەها پێمان وایە مادەی 18 یا بیسرنەوە یا نابێ وشەی سزای توندی تێدا بێ. ئەگەر هەر ئیسرارتان لەسەر سزادانی خەیانەتی هاوسەری هەیە، تکایە چاوێک لە سزای ولاتانی رۆژئاوایی بکەن. بۆ نموونە لە ئەمریکا ئەگەر هاوسەرێک بە بەلگە بیسەلمێنێ هاوسەرەکەی خەیانەت دەکات، لە ئەگەری بریاری جیابوونەوەدا، دادگا تەواوی مال و موناتی ژیانی هاوبەش دەدا بەو هاوسەرە سەلمێنەرە.
به‌و هیوایه‌ی که‌ تێکۆشانی یه‌کسانی خواز و دیموکراتتان نموونه‌یه‌کی به‌رچاو بۆ چالاکان و پارته‌ سیاسییه‌کان و ده‌وڵه‌ته‌کانی ناوچه‌که‌ به‌ تایبه‌ت کوردستان بێت چونکا تا ژن ئازاد نه‌بێت کۆمه‌ڵگا ئازاد نابێت.

  1. مەهین شوکرۆللاپوور
  2. ئەفسانە بەهەشتیزادە
  3. ناهید موکری
  4. سەحەر دیناروەند
  5. فەرزانە جەلالی
  6. نەرمین بەهەشتیزادە
  7. شەهلا دەباخی
  8. رۆئیا تلوعی
  9. ئاڤا ئەنوەری
  10. سەبری بەهمەنی
  11. رووناک فەرەهمەند
  12. لەیلا محەمەدی
  13. زۆیا رۆژ
  14. نادیا پەرهوون
  15. هیوا خدری
  16. سارا پێلتۆنێن
  17. مەهران ئەعزەمی
  18. فەریبا محمەمەدی
  19. کەنێرە هەورامی
  20. گولالە سەمیعی
  21. فریشتە گولپەروەر
  22. ئاگرین ئاتوور
  23. فەریبا قازی
  24. شیلا محەمەدیان
  25. عیسمەت سوفیا
  26. کوێستان عومەرزادە
  27. بەیانە ئیسلام پەنا
  28. مینا لبادی
  29. پەخشان عەزیزی
  30. سارا شەرارە شەمامی
  31. جینا تووتاغاجی
  32. سەحەر ئەکبەری
  33. کەژال بلووری
  34. تووبا ئەلیاسی
  35. ئەسمەر میعماری
  36. رۆژا حسێن پەناهی
  37. گولبەهار شەریفی
  38. کانی کەریمیان
  39. چەمەن حەداد
  40. مریەم فەتحی
  41. ئازیتا بەهرامی
  42. کوێستان هۆمەیلی
  43. سرگول کاتوورانی
  44. لەیلا سەقزی
  45. شکۆفە قوبادی
  46. سەیران حسێن پەناهی
  47. سنوور یونسی
  48. شاین مەحموودی
  49. کوێستان داوودی
  50. فەراسەت سالحی
  51. فەریدە رەزایی
  52. ژیلا گولعەنبەر
  53. گەلاوێژ رۆستەمی
  54. مەهاباد عەزیزی
  55. سۆما نەبەوی
  56. ئەسرین زەمانی
  57. گلالە سەعید
  58. نافعە مورادی
  59. شلێر باپیری
  60. ئازەر تاهیرئابادی
  61. بەیان مەحموودی
  62. هەلالە رەشیدی


--------
ئەم نامە لە لایەن خاتوو پەخشان عەزیزی راستەوخۆ گەیاندرا بەرپرسانی کانتۆن و پێشوازی لێ کراوە.

ژنی رۆژهەلات لە کوێی پرۆژەی رۆژهەلات میحوەریدایە؟

بابەتێک کە لە سمیناری رۆژهەلات میحوەری هەولێر پێشکەش کرا